У Карэліцкім раённым краязнаўчым музеі дзейнічае фотавыстава «Літва і Беларусь на старонках сямейнага альбома княгіні Марыі Гагенлоэ».
Княгіня Марыя Львоўна — унучка князя Дамініка Радзівіла — валодала на тэрыторыі сучаснай Беларусі больш чым 170 маёнткамі, плошча якіх налічвала каля 1 мільёна гектараў. У 1886 годзе памёр яе брат князь Пётр Львовіч Вітгенштэйн. Сям’і ў яго не было, і ўсе маёнткі ў заходніх губернях імперыі дасталіся старэйшай сястры. Марыя Львоўна была грамадзянкай Германіі. Яна ўжо ведала, што ўсе гэтыя шматлікія маёнткі, вёскі, фальваркі і некалькі палацаў давядзецца прадаць, таму што паводле законаў Расійскай імперыі толькі грамадзяне гэтай краіны маглі валодаць тут землямі.
Увосень 1889 — зіму 1890 года княгіня Марыя Львоўна Гагенлоэ-Шылінгсфюрст здзейсніла падарожжа па сваіх маёнтках на тэрыторыі Расійскай імперыі, большая частка якіх знаходзіцца ў Беларусі. Маёнтак Веркі пад Вільна быў адзіным маёнткам кн. Марыі на тэрыторыі сучаснай Літвы і лічыўся адміністрацыйным цэнтрам усіх яе ўладанняў.
У свіце княгіні быў фатограф Йохан Хікс, які ў той час служыў кіраўніком маёнтка Веркі. Дзякуючы зробленым 125 гадоў таму фотаздымкам мы можам убачыць тое, што паўстала перад княгіняй Марыяй. Большая частка сядзібаў да сённяшняга дня не захавалася. Невялікія ўтульныя драўляныя паляўнічыя дачы — любімае месца правядзення часу князя Пятра і яго сястры — не абмінуў час: у эпоху войнаў і рэвалюцый яны бязлітасна знішчаліся як спадчына старога рэжыму. І толькі на фотаздымках яны захавалі сваё аблічча.
Фотаздымкі ўяўляюць княгіню Марыю і членаў яе сям’і ў моманты падрыхтоўкі да паляванняў, часта пазіравалі яны і на фоне забітай дзічыны. У альбомах княгіні амаль няма гарадскіх пейзажаў, велікасвецкіх знаёмых. Гэтая немаладая, 60-гадовая аматарка паляванняў правяла восень і зіму ў невялікіх паляўнічых хатках у асяроддзі сыноў і невялікай колькасці слуг.
У двух старадаўніх скураных альбомах больш стагоддзя захоўваліся фотаздымкі ў нашчадкаў кн. Марыі Гагенлоэ-Шылінгсфюрст у старадаўнім палацы Шылінгсфюрст у Баварыі.
Фотавыстава з фондаў установы «Музей «Замкавы комплекс «Мір» будзе доўжыцца да 15 кастрычніка бягучага года.
